Pas ndërrimit të motmoteve, kryetari i Komunës së Vushtrrisë, Xhafer Tahiri, i shoqëruar nga nënkryetari Besim Muzaqi, kryesuesi i Kuvendit Komunal Nasuf Aliu, si dhe drejtor komunal, kanë vizituar shërbimet e kujdestarisë të Policisë së Kosovës, Qendrës Kryesore të Mjekësisë Familjare dhe Spitalit të Vushtrrisë.
Në Stacionin e policisë në Vushtrri, drejtuesit e Komunës janë pritur nga toger Feim Pantina, i cili i ka njoftuar me gjendjen e sigurisë që ishte në Vushtrri gjatë festës. Ai ka njoftuar për disa raste kryesisht të shkaktuara nga mjetet piroteknike.
Kryetari Tahiri ka vizituar edhe shërbimin emergjent të QKMF-së, ku nga mjeku kujdestar dr. Bujar Pllana është njoftuar po ashtu me intervenimin që ata kishin bërë me disa pacientë të lënduar nga përdorimi i mjeteve piroteknike që janë përdorur në festë, raporton Veriu.info.
Gjithashtu drejtuesit e Komunës kanë vizituar edhe shërbimet e kujdestarisë në Spitalin e Vushtrrisë “Sheikh Zayed”, ku janë pritur nga drejtori i këtij institucioni shëndetësor, dr. Hajrullah Saraqi, i cili ka thënë se nuk kanë pasur ndonjë rast të veçantë gjatë orëve të para të festës.
Duke i përgëzuar për punën që po bëjnë në këtë kohë, kur të gjithë qytetarët festojnë, në të gjitha këto institucione, kryetari i Komunës, Xhafer Tahiri u ka thënë oficerëve të policisë, mjekëve dhe punëtorëve shëndetësor, se kur ata punojnë, qytetarët ndjehen shumë më të sigurt. Duke i uruar, Vitin e Ri, Tahiri u ka thënë të gjithë shërbyesve si atyre të sigurisë dhe atyre shëndetësor, se puna e tyre është e shenjtë dhe shumë fisnike për qytetarët dhe Shtetin e Kosovës. /Veriu.info/